Cédese o Platuxa...
Estamos en busca dun novo propietario que siga coa súa recuperación definitiva.

No ano 2003 a directiva da Asociación Amigos da Dorna de Portonovo decidiu iniciar os trámites burocráticos para salvar do desguazamento ó Platuxa, unha lancha de madeira a motor construída en Portonovo en 1976. Así foi como a Consellería de Pesca da Xunta de Galicia nos brindou a oportunidade de "salvalo da machada".

A intención inicial era reconverter o barco, que ata entón exercera como embarcación de pesca con base en Portonovo, nun aula flotante. Tratábase dun ambicioso proxecto cultural –pode que demasiado para unha asociación tan modesta como a nosa– que non tardou en toparse de fronte cunha realidade chea de dificultades administrativas.

O caso é que, por unhas e por outras, foron pasando os meses, e despois os anos, e os proxectos non chegaron a materializarse. De xeito que, a día de hoxe, sete anos despois de asumir a responsabilidade de atopar unha alternativa ó desguazamento do barco, seguimos con dificultades administrativas e económicas, incluso para garantir o mantemento preciso para que continúe a flote.

É por iso que, trás convocar unha Asamblea Xeral de Socios, e despois de barallar tódalas alternativas posibles, achamos que a mellor opción para a asociación e para o propio barco, sempre coa pretensión última de garantir un futuro para ambos, é buscarlle un novo propietario que, como nós fixemos no seu día, se comprometa coa conservación do Platuxa.

Así, decidimos por unanimidade abrir un prazo de tres meses (ata o 1 de marzo) para que aqueles interesados –ben sexan asociacións, particulares, empresas ou algún ente público– poidan presentar o seu proxecto, despois de cal procederemos a resolver a adxudicación definitiva do barco.

Para máis información, pódese poñer en contacto connosco mediante o correo electrónico correo@amigosdadorna.org.

Algunhas fotos do barco aquí